UBlack Coffee uvuma ukwehluleka kubhidlika umshado wakhe
U-DJ odume umhlaba wonke waseNingizimu Afrika, u-Black Coffee, usekhulume ngokusobala ngokuhluleka komshado wakhe nomlingisi u-Enhle Mbali Mlotshwa, wavuma ukuthi naye wenza amaphutha amaningi.
Ekhuluma noThabo Mokwele ohlelweni lwakhe kwiKaya FM, lo mculi owine indondo yeGrammy uthe indlela akhula ngayo yaba nomthelela endleleni ayebuka ngayo umshado.
“Ngahluleka kabi implela,” kusho uBlack Coffee kule ngxoxo.
Uthi ukukhula ngaphandle kwabazali bobabili, ngenxa yokuthi umshado wabo wahluleka, kwamenza wazakhela owakhe umqondo wokuthi umshado kufanele usebenze kanjani.
“Ngenxa yendlela engakhula ngayo, ngazitshela ukuthi uma sengishadile ngizokwenza izinto ngendlela yami,” kusho yena.
Uthi wayefuna ukuhola kukho konke aze akhohlwe ukuthi naye umlingani wakhe unemibono nezifiso zakhe.
“Ufuna ukuba ngungqaphambili kuyo yonke into, ukhohlwe ukuthi kukhona ohlezi eduze kwakho ophethe imephu.
“Wena ushayela imoto, kodwa yena ungumqondisi wendlela,” kuchaza yena.
U-Black Coffee uveze ukuthi wake wathengela owayengunkosikazi wakhe imoto ebizayo, kodwa indlela aphendula ngayo yamphoxa.
“Ngangilindele ukuthi aze akhale ngenxa yenjabulo, kodwa wavele wathi, ‘Yinhle, ngiyabonga.’
“Lokho kwangihlupha isikhathi eside, ngaze ngacabanga ukuthi akakwazi ukwazisa engimenzela khona.”
Uthi namuhla uyabona ukuthi wayezama ukuphoqa izifiso zakhe kumlingani wakhe esikhundleni sokuzwa ukuthi yena ufunani empilweni.
“Kwesinye isikhathi siyazilimaza ngoba sifuna abantu bajabulele izinto esifuna bona, hhayi lezo abazifisela zona,” kusho yena.
Usebenzise isibonelo sokuyisa umuntu eholidini elibizayo.
“Uma wena ufuna ukuya enyangeni bese uthatha umlingani wakho, kungenzeka uma nifika athi ufuna ukubuyela ekhaya.
“Kufanele nilinde nize nifune into efanayo nobabili,” kuchaza le nsizwa enguNkosinathi Maphumulo igama layo langempela.
- NALU OLUNYE UDABA: UMbali Ngiba udedela ibhomu ngezigemegeme ezamehlela kuMkhokha
U-Black Coffee uthi ukuzihlola ngobuqotho kumsize ukuthi athole ukuthula futhi aqale ukuzixolela.
“Uma umshado usuphelile kulula ukusola omunye umuntu,” kuqhuba yena.
“Kodwa uma uzihlola ngobuqotho, uyabona ukuthi nawe wenza amaphutha amaningi.
“Yilapho kuqala khona ukuphola nokuzixolela. Akekho umuntu ozophila abe umuntu ophelele.”
