UTshatha ‘ugadla’ kubazalwane ngokubiza abefundisi ngobaba
Umsakazi onedumela woKhozi FM, uKhathide kaTshathugodo Ngobe uselithweze ekhanda kubazalwane, ebasola ‘ngokukhonza’ izingane.
Lo msakazi odume ngelikaTshatha uthi yena akaziboni nje esebiza indoda elingana naye, noma encane kunaye ngobaba.
“Ake nisho wemakholwa – lawa asontayo. Manje emasontweni enu abefundisi nibabiza ngoyihlo?
“Encane ingane le ibizwe ngobaba ngisho nangabantu abadala kunayo?
“Njengoba lingaka nje iBhayibheli kukuyiphi incwadi ukuthi umfundisi kufanele nimubize ngoyihlo?,” kubuza uTshatha.
Uveze ukuthi kunamakholwa avame ukumcela ukuba ake avakashe emabandleni awo ngenhloso yokuzozwa intshumayelo.
Kodwa uthi yena ngeke alunge ngoba le yokubiza abefundisi ‘ngobaba’ ngeke ayimele neze.
“Njengoba nihlale nizama ukungimemela emasontweni enu nje nifuna nami ngiyobiza amanye amadoda angangami ngobaba? Klibhi!.”
Lo msakazi – obekhonza koFakazi phambilini – useyaziwa ngokubuzisisa ngezinto ezithinta iBhayibheli bokuhunyushwa kwalo.
OLUNYE UDABA: INedbank nohlelo lokukhokhisa losomabhizinisi abasebancane
Ngokusho kwakhe uqwashisa abantu ngokuthi bangadidiswa ngendlela engafanele kusetshenziswa le ncwadi engcwele.
