U-Amanda Khomo akagcini ngokulingisa, ungumbhali nomsakazi
Ibhalwe nguJerome Thabethe
Umlingisi wesifazane osemncane, u-Amanda Khomo ufakazela ukuthi ungaphezulu kobuso obuvela kumabonakude nje.
Lo mlingisi onekhono ozalwa eNtuzuma eThekwini, usezakhele igama eliqinile emkhakheni wezokungcebeleka eNingizimu Afrika.
Futhi manje, usengeze ukuba ngumbhali nomsakazi ohlwini lwakhe olukhulayo lwezinto adlondlobala kuzo.
U-Amanda Khomo useke wabonakala emidlaweni kamabonakude okukhona kuyo Isidingo, Generations, Uzalo, neDurban Gen.
Ngemuva kokulingisa abantu abehlukene kule midlalo, uthole ukuhlonishwa ngokulingisa kwakhe okusezingeni eliphezulu.
Ekhuluma ne-Isiqgisethu.com, kuleli sonto, ukhumbule uhambo lwakhe kule ndima yezokungcebeleka nokunandisa.
“Uthando lwami lokulingisa lugqugquzelwe nguSindi Dlathu,” kuchaza le ntokazi.
“Kwathi lapho ngimbona kumabonakude, ngazitshela ukuthi ngelinye ilanga nami ngizofika lapho.
“Nomufi uMartin Ziqubu naye wadlala indima enkulu empilweni yami — sasisondelene kakhulu, futhi ngafunda okuningi kuye.”
Kodwa u-Amanda Khomo akagcini ngokuvelela kumabonakude nje kuphela.
Ngo-2020, washicilela incwadi yakhe yokuqala ethi, Hurt Losing a Loved One, ayebhala kuyo ngezinto ayedlule kuzo yena uqobo.
“Kule ncwadi, ngikhuluma ngobuhlungu bokulahlekelwa umzali nokuthi abantu bangadlula kanjani kulesi simo baphinde babe nethemba,” kuchaza le ntokazi.
“Kumayelana nokukhumbuza abanye ukuthi bangaphendukeli ezidakamizweni noma ekuziphatheni okungekuhle lapho impilo iba nzima.”
Eminyakeni emibili edlule, wakhipha enye incwadi esihloko sithi iSodoma neGomora — la ebheka khona ukuphela kobuntu nobudlova obukhulayo emiphakathini yethu.
“Abantu abaningi bavele bacabange ngendaba yeBhayibheli,” kusho u-Amanda.
“Kodwa le ncwadi yami ikhuluma ngokwenzeka namuhla — ukuhlukunyezwa kwabesifazane nezingane.
“Abantu balahlekelwe onembeza babo, futhi ngifuna ukusiza ukuvuselela lokho.”
OLUNYE UDABA: Isilwane sibonga uthando lwabalandeli ngempumelelo emculweni
U-Amanda Khomo uthi ukubhala kwakhe sekumvulele iminyango eyengeziwe, okuholele ekutheni ajoyine Izwi Lomzansi FM, lapho esakaza khona i-Sicikoza namaciko.
Umlayezo wakhe entsheni ulula kodwa unamandla: “Hlonipha umhlaba, ukuze umhlaba ukwazi ukukuhlonipha.”
