USphiwe Hadebe uthisha osebenzisa umsakazo ukufundisa ngobuciko
– NguJerome Thabethe
Umsakazi wesiteshi somphakathi Izwi Lomzansi, uSphiwe Hadebe, usezakhele ugazi, ohlelweni lwakhe la enika khona amaciko ehlukene inkundla yokugiya.
Uhlelo lwakhe olusihloko sithi Izwi lamaciko, lungena njalo ngoLwesibili ngo-8.30 ebusuku, kanti yize liyimuzuzu engu-30 kuphela, umthelela walo uyabonakala.
Isigqi Sethu sixoxisane naye umfokaBhungane ukuzwa kabanzi ngemvelaphi yakhe nokuthi uthando lobuciko lusukaphi futhi uhloseni ngalo.
Uthi amagama akhe okuzalwa nguSphiwe Wiseman Hadebe kanti ingono yakhe iseHighflats, eHlokozi ogwini oluseningizimu yeKwaZulu-Natal.
“Ngiyimbongi ebhala izinkondlo zesiZulu… Lowo ngomunye wemisebenzi engiziphilisa ngayo,” kuchaza uSphiwe Hadebe.
“Uhlelo lwami luthandwa kakhulu ngabalaleli ngoba bayasizakala ngalo. Ngibuye nginike ithuba kulabo abayizimbongi, nababhali bezinkondlo ohlelweni lwami.
“Lelo thuba basuke bezibonakalisa kubalaleli, ngokuveza amakhono abo,” kwengeza yena.
Eqhuba, uthi kubalulekile ukuzimisela kulo mkhakha, nokwenza ucwaningo ngaso sonke isikhathi ukuze uhlale wazi ngokwenzeka ezweni.
“Uma wenza kanjalo, kuba lula ukudlulisela umlayezo kwabanye abantu,” kuqhuba yena belu uSphiwe Hadebe.
“Maningi amaciko asafufusa esesizakele ngalolu hlelo. Engingambalula nje osephumelele odlule kulo nguMfanafuthi Shange wakwaDumisa.
“Wabhala inkondlo esihloko sithi Qhawe, okwakuyindlela yokubonga ukusebenzisana kwethu.”
Ngokomsebenzi wansukuzonke, uSphiwe Hadebe unguthisha kwesinye sezikole Ethekwini angathandanga ukusidalula okwamanje.
Uthi uthando lokusakaza yinto ayenayo esakhula, kanti ubukele kubasakazi abadala, okubalwa kubo uBongani Mavuso wodumo kuKhozi FM osadlula emhlabeni.
“Amabanga aphezulu ngiwafunde eMbelebeleni High School eMlazi kwaQ, ngaqeda khona ibanga leshumi.
“Ngemuva kwalokho ngabe sengiyokwenza izifundo zobuthishela kwenye yamanyuvesi akhona la Ethekwini.”
OLUNYE UDABA: UPenny Ntuli uziphendulela ngokufequza emgwaqeni
Kuyingakho ngingena kanye emsakazweni, kodwa zikhona izihlelo engizenzayo emsakazweni ukuvala izikhala kulobo abasuke bengekho ngalolosuku.
Akuzange kube lula ukuba ngize ngibe lapho ngikhona kube ukubekezela, ekhuthaza nabanye abafisa ukungena kulomkhakha
