UPenny Ntuli uyaziphendulela ngokufequza emgwaqeni
Umsakazi weJozi FM, uPenny Ntuli usegcine ephawulile ngevidiyo yakhe esuse umsindo ezinkundleni zokuxhumana ekuqaleni kwaleli sonto.
Le ntokazi eme kahle ibonakale idansa ime eduze komgwaqo onguthelawayeka uN3 ngaseMtshezi, ngesikhathi kudlula amaloli emshayela amahutha.
Ubehambisana nenye intokazi beshaya lo mdanso wokufequza nokutshikizisa izinqa okuthiwa uku-twerker.
Eziphendulela, uthe akaxolisi kodwa uyacacisa nje okwenzekile, nokuthi ubekwenziswa yini.
“Angiyenzi le vidiyo ngenhloso yokuthi ngizoxolisa – lutho,” kusho le ntokazi.
“Kodwa ke ngiyabona ukuthi ziningi izinkulumo esezisuka esezihlose into okungesiyona.
“Ngibonile ukuthi uma ngibhala – phela uke ubhale into umuntu ayithathe ayibhekise le noma ayizwe ngendlela yakhe.
“Ngakho ngithe angeze ividiyo. Cha, ngike ngabonakala emgwaqeni onguthelawayeka ngase-Estcourt, nakhona ngidansa nje.
“Ngiqoke ukupaka laphaya ngoba bese ngishayele isikhathi eside, ngabona uma ngisondela kuleliya bhuloho ukuthi angisakhoni, nganquma ukuma.
“Ube mnandi ke umoya esiwuthole laphaya eduze kwaleliya damu njengoba ubonile kade sishutha ubuhle bendawo nedamu…
“Sigcine ke sesidansa sizijabulisa nje. Engikwenzile bekungaqondile ukulimaza abanye abantu.
“Sengimane ngiyasho nje kodwa ngiyazi ukuthi ezinye izinto sezenzeka ngoba nginguPenny Ntuli, ukube bekungomunye umuntu nje ngabe lento ayinakwanga nokunakwa.
“Kodw ake ngiyakuqonda ukuthi izinga lomsebenzi engiwenzayo ongibeka kulo.
UPenny Ntuli uthi aabantu abazigadele izingane, zingabuki kuye
“Ake siqale la, ngibone ukuphawula okuningi kuthiwa utswala buyangihlula…
“Ewu, kulabo bantu abasho njalo ngiyabona ukuthi nibasha layikhaya. Mina, uMaMphemba, uNdlela kaSompisi, uGodide,” esho ezithinta esifubeni.
“Angibulokothi, angibulokothi utshwala. Konke engisuke ngikwenza, ngikwenza ngisuke ngikwenza ngisezingqondweni eziphelele.
“Ayikho into engiyenza ngoba kunesidakamizwa esisemzimbeni wami.
“Okwesibili, ngibone abanye omzala bami bethi lokhu engikwenzile kumele kube yishalenji entsha.
“Lutho, akumele kube njalo. Akuphephile, ngicela ningakwenzi.”
UPenny Ntuli ukuvumile nokuthi kukhona abathe uma bephawula, bebeka imizwa yabo ngalento yakhe, wabona ngenye indlela.
“Yize abantu beyaye bedanse emigwaqeni, ebengidansa kuwo awuphephile neze. Sihlezi sizwa ngezingozi eziku-N3.
“Yibo labo engizothi ngiyaxolisa kubo ngoba bakhuluma ngokunguzwela. Ngibabonile nje abanye besho ukuthi abasho kabi, kodwa indawo engenzela kuyo ayiphephile.
“Bathi bengingadala ingozi ngoba omunye umshayeli ubengagcina enaka mina mina ehlukela ukulawula imoto.”
UPenny Ntuli ube esephika nokuthi uyisibonelo sezingane zabantu, yena uyisibonelo ezinganeni zakhe kuphela.
Uthe abantu abazigadele izingane zabo, ngoba naye uyazigadela ezakhe futhi akafuni zibukele kwabanye abantu.
