Uthembisa uju kwiPodcast yakhe uSonia Mbele

Ngemuva kwesinqumo seMultiChoice sokuhoxisa iReal Housewives of Johannesburg (RHOJ), umlingisi ophinde abe ngumdidiyeli we-TV uSonia Mbele ungena ebhizinisini elisha.

Usezokwethula i-podcast yakhe enesihloko esithi Woza Nazo. 

UMbele owaziwa ngokulingisa emdlalweni kamabonakude oyingqophamlando iGenerations, usezimisele ngokungena endimeni entsha. 

Ngokubika kweZiMoja, uSonia Mbele uthembisa ukuthi iWoza Nazo izoba yinto ezokhuluma nje nganoma yini. 

“Asiqhamuki nezindaba nezihloko ezingathi shu. Lokhu kuzonika amandla, futhi igama le-podcast libizwa ngokuthi Woza Nazo,” usho kanje kwabeZiMoja. Lo somabhizinisi uzimisele ukubhekana nezinhlobonhlobo zezihloko, ngisho nalezo ezingase zingehli kahle kwabanye.

Umbono we-podcast ubangelwe yimpumelelo yombukiso wangaphambilini awuphathe kwiNetflix. 

“Abantu bebeyithanda kakhulu futhi bebeyincoma. Ngacabanga, ‘Kungani ungazami into enjalo?’” kusho uMbele. 

Ngokwamukela okuhle komsebenzi wakhe wangaphambili, unqume ukwandisa ukufinyelela kwakhe futhi enze i-podcast eheha izethameli eziningi.

I-Woza Nazo izoba nengxubevange yezivakashi, kusukela kosomabhizinisi kuya kosaziwayo, ngisho nabantu abajwayelekile abanezindaba ezimangalisayo. 

OLUNYE UDABA: Unqabe ukuphawula umculi ovukwe yidlozi esesteji

“Izobhekelela wonke umuntu. Angigcini ngosaziwayo kuphela. Njengezihloko zethu,” kwengeza uMbele.