EzintshaUmculo

Umbango ovuthayo ngengoma entsha kaZahara 

Sekuuqubuke ingxabano ngengoma kaZahara engakaphumi esihloko sithi, Emva Kwendlu.

 Kule ngoma uhambisana nesihlabani uCsana, ogama lakhe langempela nguNonguquko Mlaza. 

UCsana noZahara, ogama lakhe langempela nguBulelwa Mkutukwana, baqophe leli ngoma ngasekuqaleni kuka-2023. 

Okubuhlungu wukuthi uZahara udlule emhlabeni ngoDisemba, ingakaphumi ingoma.

Abaphathi bakaCsana bebehlele ukuyikhipha ngo-Agasti 30 le ngoma. 

Nokho abayitholanga imvume kubaphathi bakaZahara. 

Odadewabo kaZahara, uBandezwa noLumka, nethimba lakhe labaphathi, bamile ekugodleni imvume. 

Bathi uZahara akazange ashiye miyalelo ngokukhishwa kwale ngoma.

Asebeke bayizwa i-Emva Kwendlu bakholwa wukuthi ingaba yingoma eshisa izikhotha ngamaholidi kaKhisimusi ozayo. 

Umthombo osondelene nalesi simo uveze ukuthi uBandezwa ukhathazekile ngenkokhelo. 

“Ufuna ukwazi ukuthi yimalini abazoyithola ngale ngoma,” kusho umthombo.

Le ngoma yaqoshwa ngokunganaki ngabangani ababili ngesikhathi beziphumulele emakhaya e-Eastern Cape. 

UCsana udabuka ePort St. Johns, kanti uZahara yena ubengowase-East London. 

Ekuqaleni, bebengahlele lutho ngale ngoma. Lo msebenzi wamiswa ngesikhathi uZahara egula. 

“Bekungeke kulunge ukuthi uCsana akhiphe ingoma ngesikhathi uZahara esesibhedlela,” kwengeza umthombo.

Umthombo uphinde waveza ukuthi ukukhipha leli culo kuzohlonipha uZahara. 

“UCsana ufuna ukukhumbula umngani wakhe ongasekho ngale ngoma. 

“Imnandi kakhulu, lesi simo siyaphoxa kubalandeli,” kusho umthombo.

Omunye umthombo udalule ukuthi imenenja kaZahara, u-Oyama Dyosiba, idinwe yindlela okusingathwe ngayo lolu hlelo. Uzizwa eshiywe ngaphandle. 

“Kwenzeka kanjani ukuthi akukaze kukhulunywe nami ngaleli culo? Kuzothiwani uma singalithandi?,” kubuza uDyosiba.

Uvumile ukuthi uCsana noZahara babevumele ngokusebenzisana kodwa wagcizelela ukuthi imigudu efanele ayilandelwanga. 

“Kunezinqubo okumele umuntu azilandele; awuvele ushiye ingoma,” kwengeza yena.

UThanduxolo Jindela, ongumkhulumeli kaCsana, umemezele ukuthi ukukhishwa kwengoma kumisiwe okwesikhashana. 

Lolu daba selusingethwe ithimba labo labameli. “Siyaxolisa kubalandeli bakaCsana,” kusho uJindela. 

Ikusasa le Emva Kwendlu alicaci njengoba izinhlangothi zombili zisadonsisana ngale ngoma.