EzintshaUmabonakude

Isasasa kubuya isiphalaphala ezindabeni zesiZulu kwiSABC1

Umethuli wezindaba zesiZulu kwiSABC News, uNoxolo Mtshali, usememezele ukuthi uyabuya kulo msebenzi.

NgoMbasa, le ntokazi yamemezela ukuthi iyawushiya lo msebenzi walo.

UMtshali ungene ezinkundleni zokuxhumana ngoMbasa ememezela ukuthi sesiyaphela isikhathi sakhe sokuba ngumethuli wezindaba zesiZulu.

Waqhube wathi ayikho into emjabulisa njengokufunda izindaba ngesiZulu, ulimi lwakhe lwebele, aziqhenyayo ngalo.

NgoLwesine, uMtshali uphinde wangena ezinkundleni zokuxhumana ememezela ukuthi uzobuyela kumabonakude ngoMandulo.

Uthe ugogo wakhe ubehlezi ebuza ukuthi kanti ukuphi uma evula umabonakude ngo-7 ebusuku ebuka izindaba kuSABC1, ngethemba lokuthi uzobona umzukulu wakhe.

“Yilolu hlobo lwemiyalezo engiyithola mihla namalanga eyenze kwaba lula ukuthi ngibuye ngesikhathi ngibizwa ukuthi ngibuyele ezindabeni zesiZulu kuSABC,” usho kanje.

“Bengingeke ngisakwazi ukuziba izikhalo zenu, yingakho ngithobeka kakhulu ukunazisa ukuthi intokazi yenu iyabuya.

“Ukwethulwa kwami kokuqala kuzoba ngoMsombuluko, mhla ka-2 kuMandulo 2024. 

“Uthando engipha lona luyangithobisa kakhulu. Asiqhubeke siqhakambise ulwimi lweSintu. 

“Alungafi ngathi, asiqhubeke sikhulumele izilimi zethu. Izilimi zethu akumele zife sibuka,” kubhala uMtshali.

UMtshali waqala umsebenzi wakhe eminyakeni engu-15 edlule engumethuli wezindaba zezingane.

NgoNhlangulana ka-2023, waqala ukwethula uhlelo lwasekuseni lwamahora amathathu olubizwa ngokuthi Ekhaya Jikelele.