Uxakekile umndeni kubulawa okaMaskandi eHostela
Sekufe umculi kaMaskandi obebonakala enekusasa elihle kulo mculo kwelinye lamaHostela aseGoli.
Kubikwa ukuthi uMpho Njoko, oneminyaka engu-35, udutshulwe ngabantu abangaziwa abavele babadubula bebuya kozithengela ukudla.
Lo mculi, odabuka eNquthu, udutshulwe ehambisana nomngani wakhe eHostela laseVosloorus, eGoli.
UJabulani Langa okhulumela umndeni uthe le nsizwa beyisanda kubuyela nje eGoli njengoba kade yehlile ngamaholidi ePhasika.
“UMpho ubekade esekhaya ngamaholidi ePhasika kuthe kuthangi (ngoMgqibelo) wase ekhuphuka eya eHostela, eVosloorus lapho ehlala khona.
“Ube esephuma nomngani wakhe wakwaNongoma beyothenga ukudla.
“Endleleni kume imoto yavulela ngenhlamvu bashonela khona lapho,” kuchaza uLanga.
Ngokusho kukaLanga, abakabi nalo usuku oluqondile lokuthi uzongcwatshwa nini.
“Sisalinde ukuthi ahlinzwe akhishwe izinhlamvu emzimbeni, sicabanga ukuthi uzongcwatshwa ngoMgqibelo noma ngeSonto.”
OLUNYE UDABA: Izinsolo ezingezihle ngoPenny Ntuli kwiJozi FM
Uthe eminye imininingwan ebazoyimemezela ngokuhamba kwesikhathi, wacela kunikwe umndeni isikhathi njengoba ugubezelwe ifu elimnyama.
