UMthandeni akafuni kusolwane ngekhasi likaFacebook

Ukuvalwa kwekhasi likaFacebook bengqwele kaMaskandi, uMthandeni “SK” Manqele kususe izinkulumo mpikiswano nokusolana.

Njengokulindelekile, abalandeli bakhe basole imbangi kaMthandeni enkulu, uKhuzani nabalandeli bakhe ngalokhu.

Laba baculi cishe bayiKaizer Chiefs ne-Orlando Pirates emculweni kaMaskandii njengoba behamba phambili ngabalandlei.

UMthandeni abalandeli bakhe ubabiza ngamaRed Nation, kanti abakaKhuzani bona babizwa ngeBlue Nation.

Ukuphikisana ke ngokuthi ngubani ohlula omunye phakathi kwabo yinto ehlezi ihamba phambili kubalandeli ikakhulukazi ezinkundleni zokuxhumana.

Kumanje kunombango omkhulu wokuthi iyiphi ingoma izodla umhlanganiso, ihlukanise unyaka oKhozini FM.

UMthandeni ufolosa ngeParis ayicula ngokubambisana noLwa Ndlunkulu futhi ethandwa kakhulu kwiTik-Tok nakwezinye izinkundla.

UKhuzani yena ukhiphe Umjolo Lowo ehambisana noLuve Dubazana. Ukuvalwa kwekhasi likaMthandeni kususe umsindo.

Abalandeli bathi umona wokuthi abakaKhuzani abafuni uMthandeni akhuthaze abalandeli kule nkundla ukuba bavotele ingoma yakhe.

Nokho yena unxusa ukuba kwehliswe imimoya, kuyekwe ukukhombana ngeminwe ngoba ngeke kusize ngalutho.

“Nakhu la ngizotholakala khona okwesikhashana sisalinde uhlelo lokulunga kwekhasi lami elimpintshiwe,” kubhala uMthandeni kuFacebook wakhe.

“Baf’wethu, ngiyacela ningasoli muntu ngalesi senzo sobuthakathi. UNkulunkulu ukhona.

“Okwethu nje ukuthobeka siphinde siqhubeke sithokozele umculo wethu omnandi ka#Mthandeni, Mr Paris. Siyabonga.”

Ukuvotela ingoma ezohlukanisa unyaka kuKhozi FM kwenziwa ngokuthumela umlayezo oyi-SMS kanti sezikhethiwe eziyisumi okuzokhethwa kuzo.

Zikhona ke ezoMthandeni noKhuzani. Kukhona nezinye zaMapiano neHouse okungakhethwa kuzo.

Ukuvotela ekaMthandeni, uthumela umlayezo othi “ingoma” ulandelise ngokufaka u-“B” bese uthumela ku-33665.

Uma ufisa kube ekaKhuzani, uthumela umlayezo othi “ingoma’’ ulandelise ngohlamvu “E” bes euthumela ku-33665.