Uza nomunye umculo omusha uG-Ugly, uchaza naleli gama
Ngemuva kokushicilela udaba lwethu ngomculi weHip Hop ohlala emakhaya uMthobisi “UG-Ugly” Gabuzela, kwaba nabakhala ngokuthi lichazani leli gama lakhe.
Uma simbuza ngalo umfo kaGabuzela, akachithanga sikhathi, uvele wahlala phezulu kodaba.
“Hhayi ilula leyo bafo, u-G umele isibongo sami uGabuzela,” kusho le nsizwa esencane.
“U- U umele u-Unconditional, u-G amele u-God, u-L yena umele u-Loves bese u-Y amele u-You.”
NgesiZulu. Lokhu kuchaza ukuthi uMdali ukuthanda ngokungenamkhawulo.
“Ngangifuna igama engizobizwa ngalo kule ndima yezomculo ngathola leli,” kuqhuba uG-Ugly.
Ube esesitshela nokuthi uphezu kwezinhlelo zokukhipha imunye umculo maduze nje.
Uzokhipha icwecwe le-EP ngomhla ka-29 kuMandulo athi libophele amanoni amnandi ayisishiyagalombili kuphela.
Lesi sihlabani esisesincane somculo weHip-Hop sizokhipha leli cwecwe nje kade sisanda kushiya abalandeli balo mculo eCape Town Amphitheater bengawuvali umlomo.
Uthe abathandi bomculo wakhe nabathandi beHip-Hop nje jikelele bazobhema bakholwe njengoba ebaphathele amanoni amasha nakholwa ukuthi bazowathanda kakhulu.
Ezingomeni zakhe ezintsha kukhona ethi Wayisusa iNkulumo. UG-Ugly uthi ngamaholidi kaZibandlela uzohambela amadolobha ahlukene kuleli ngenhloso yokuphakela abalandeli umculo wakhe.
OLUNYE UDABA: Ukwelashwa kochithekelwe yingane engakayibelethi
Izingoma zakhe ezintsha zizotholakala ezitolo zomoya ezifana noYouTube, Tik-Tok, Spotify, ne-iTunes.
