Uzifake obishini uNgizwe evulela ulabhabha wempama

Owayengumsakazi woKhozi FM, uNgizwe Mchunu usephinde wazithola efunwa yingalo yomthetho kulandela isigameko sokushaya. 

UMchunu uvele unecala abhekene nalo njengoba aboshwa ngo-2021 esolwa ngokususa udlame oluhambisana nezibhelu zangoJulayi nokwephula uMthetho Wokulawulwa Kwezinhlekelele. 

Wake wakhwela wadilika kumengameli uCyril Ramaphosa no-Eskom ngenxa yodaba lokucishwa kukagesi eNingizimu Afrika. 

UNgizwe akayena umafikizolo ezingxabanweni nokukhuhla abantu ngendlela engafanele.

Kulo nyaka uke wabiza uDJ Tira (Mthokozisi Khathi) ngenja, umkhohlisi nomqambi wamanga odla izidakamizwa.

Uzifake enkingeni ngemuva kokushaya uzakwabo ongumculi uSabelo Ngema ngempama.

USabelo, osebenza kwiNuz Group Media nongunobhala-jikelele weMlazi Township Tourism, kusolakala ukuthi uhlaselwe uNgizwe emcimbini we-Impucuzeko Maskandi Festival phambi kwezihambeli, muva nje.

Ngokusho komthombo ongathanda ukungadalulwa ngenxa yokwesaba ukwesatshiswa, uSabelo usondele kuNgizwe wafike wabingelela. 

“Sasihlezi sonke, waqhubeka waguqa, welula isandla ebingelela. Okulandelayo, sambona eshaywa ngempama,” kusho umthombo wabeZimoja. 

Umthombo awuzange uyizwe indaba yengxoxo yabo kodwa uthi iphenduke yaba nodlame ngomzuzwana. 

NALU OLUNYE UDABA: Ufike ngodli kuMaskandi uNgeneyntweni onamakhono amaningi

“Yonke into yenzeke ngokushesha. USabelo akazange alwe kodwa uthukile. Abantu bayivimbile impi ingakabi yimbi. 

“Kodwa angiboni ukuthi wayezophindisela ngoba wayebukeka ethukile.”